Burera: Bamaze imyaka 2 bishyuza ingurane z’ibyabo byangijwe

Hari abaturage bo mu Karere ka Burera bavuga ko bamaze imyaka isaga 2 basiragira mu bayobozi basaba kwishyurwa ingurane z’imitungo yangijwe n’ikorwa ry’ibikorwaremezo bitandukanye, byiganjemo iby’amazi n’umuriro ariko na n’ubu ngo amaso yaheze mu kirere.

Bamwe muri aba baturage biganjemo abo mu Murenge wa Rwerere RBA yasanze ku biro by’Akarere ka Burera, baje kubaza ingurane z’imitungo yabo.

Aba baturage bavuga ko gutinda kwishyurwa ingurane z’ibyabo, hakaba hashize imyaka isaga 2 byagize ingaruka ku iterambere ry’imibereho myiza yabo bagasaba inzego bireba kubishyura.

Umuyobozi w’Akarere ka Burera, Mukamana Soline avuga ko ari byo hari abaturage batarishyurwa kubera kutuzuza ibisabwa, gusa ngo amafaranga arahari yo gukemura ibi bibazo.

Mu mpera z’umwaka wa 2023 nibwo mu Turere 5 tugize Intara y’Amajyaruguru, twagaragaje ko habaruwe ingurane z’imitungo ifite agaciro ka Miliyari 5 na miliyoni zisaga 500 Frw igomba kwishyurwa abaturage.
Icyo gihe ubuyobozi bw’iyi Ntara, uturere n’ibigo bya WASAC, REG na RTDA byari byihaye igihe cy’amezi 3 yo kuba barangije kwishyura abaturage, ariko benshi muri bo ntibarayaca iryera.

Uwimana Emmanuel